O europeo máis vello

O europeo máis vello da historia viviu na serra de Atapuerca fai 1,2 millóns de anos, un dato sobre o que os científicos xa estaban traballando pero que corroborou o achado da súa mandíbula neste xacemento burgalés.

O primeiro homínido de Europa' recolle as principais conclusións do novo descubrimento do equipo investigador de Atapuerca, dirixido por Juan Luís Arsuaga, José María Bermúdez e Eudald Carbonell, e que se produciu o 30 de xuño de 2007.

Os científicos do Centro Nacional de Investigación sobre a Evolución Humana (CENIEH) de Burgos e do Institut Catalá de Paleoecología Humana i Evolució Social (IPHES) de Tarragona evidencian con multitude de probas a presenza de homínidos no sur de Europa nunha fase moi temperá do Pleistoceno Inferior.

A mandíbula foi atopada na cova denominada Sima do Elefante situada a uns douscentos metros do xacemento da Gran Dolina, onde en 1994 atopáronse os primeiros restos do Homo antecessor e a uns mil da Sima dos Ósos, onde se localizaron máis de 6.000 fósiles da especie Homo heidelbergensis.

Segundo informou o propio equipo investigador, o achado "confirma e reforza a teoría da antigüidade da presenza dos primeiros homínidos que chegaron a Europa".Así mesmo, xunto á cavidal fósil, a coñecida como T-9, atopáronse utensilios de sílex de tradición Olduwaiense así como especies de roedores que demostran o espazo temporal ao que pertence o achado.

A mandíbula conserva algúns dentes e a ela corresponde ademais un segundo premolar inferior que foi atopado dous días antes no nivel CHE-9, e que se presentou aos medios de comunicación o 29 de xuño de 2007. Este descubrimento foi crucial, do mesmo xeito que o deste novo fósil, porque fai retroceder en case medio millón de anos a chegada dos primeiros homínidos a Europa.

En canto á procedencia orixinaria do espécime, aínda por determinar, apúntase que a morfología da cara anterior da sínfisis, a rexión anterior da mandíbula onde se reúnen as ramas horizontais, é primitiva e recorda á de fósiles africanos do Pleistoceno Inferior atribuídos a Homo habilis e Homo rudolfensis, aínda que, polo momento, vinculouse provisionalmente ao Homo antecessor.

Os científicos cren "probable" que a primeira poboación europea proceda da rexión do Oriente Próximo, verdadeiro cruzamento de camiños entre África e Eurasia, e que estivese relacionada coa primeira expansión demográfica fóra de África que, na actualidade, está representada polos homínidos de Dmanisi. Os investigadores descubriron ata un total de 32 ferramentas de sílex que estes homininos posiblemente utilizaron para aproveitar a carne dalgúns grandes herbívoros, como mostran as marcas que os útiles líticos deixaron sobre algúns ósos animais.

Os científicos foron capaces de obter todas estas probas mediante a utilización dunha variedade de técnicas, como paleomagnetismo, biocronología e o estudo da descomposición radioactiva dos isótopos nos sedimentos.

Con este descubrimento podemos coñecer máis sobre a historia da orixe dos homínidos en Europa.